Kirmesspruch ???

Ihr lieben Leut von Rauastä

un ölla ümliegenda Gemä,

Mir frän uns, deß ihr kumua seid,

denn 2. Kerwestoch is heit.

Ihr wöllt wos hör,ich muß mich ploch,

denn ich muß heit mein Spruch aufsoch.

Da Spruch wor heuer a schwiericha sach,

denn wa will noch so a Arbet mach!

Fertich worn sen me grad noch so,

sünst ständ ich ja schließlich a net do.

Ich will jetzt net weiter philosophier,

loß me dös Johr mol Revü passier:

Mir ham zwor Toch un Nacht gesücht,

viel Strechla ham me net zamgegricht.

A poor deva konnt me net verwend,

weil me halt die Rauestäner kennt.

Denn mancher, da im Kerwespruch wor,

wor schellich mit uns übers ganza Johr.

Seid so gut‚ losst diesmol Ärcher un Haß,

denkt ümmer dra, es is Ölles a Spaß.

Erinnert euch ans letzta Johr,

wos dösfe a Hitzeperioden wor.

Leut, wor dös häß,w or dös öft schwül,

do wor en ölles am Körper zeviel.

Un so mancha Fraa un mancher Ma

wär garn rümgeloffen wie am FKK.

Die Hitz‚ die hat sich überol gstaut,

es wor en ze worm in de ächna Haut.

Nachts hat me vur Hitz lang wachgelachen,

drüm gibs a heuer viel Kinnerwachen!

In da Hitz sen die sichersten Quallen versiecht,

un die Küh ham grüna Brillen griecht,

denn wie Gros aussieht, hätten sa sünst vergassen

un dös,wos me na vürgsetzt hot, nimmer gfrassen.

Wohr is ower ä unbestritten,

es ham a die Menschen Durscht gelitten.

Wan hots do net nach an Bierla gelüst,

doch Bier wor kostborer als dös Wasser in de Wüst.

Gedrängel gabs vur de Wertshaustür,

besonders wachen dan Flaschen-bier.,

Dös Bierergattern wor grad so beliebt,

als wenns im Konsum Banana gibt.

Die Wert‚ die hattens a net leicht,

weil dös Bier net vorn un hinten reicht.

Wumit söll me dan Durscht noch still?

Wos söll ich nei die Gläser füll?

Ümmerzu gett die Wertshaustür.

Wos setz ich bloß dan Leutna vür?

Wos sollten die orma Wertsleut mach?

salbst de Wasserhahn ging schwach.

Ä Wertshaus ower hats geschafft,

do gabs jeden Toch Rhabarbersaft.

Hoffentlich werd dös Johr net so häß,

sünst trinken me heuer unnern ächna Schwäß.

Ma - socht die Fra - tu es Auto raus,

mir müssen fix mol auf Sumbarch saus,

Weng Zeit hot an dan Toch da Ma,

drüm mahnt a eindringlich sei Fra:

Zieh dich ower net erscht neu a,

steck ne fix mol dein Mantel na.

In Sumbarch is bal ölles klor,

un sie könnten widder hemwarts gfohr.

Doch is me ämol in de Stadt,

me ümmer nuch wos ze erledigen hat.

Un dös wißt ihr öllaa,

ze besorchen hot ümmer wos a Fra.

Sie kümmt drüm a auf die Idee:

Wie wärs, wenn ich heit gleich zum Hoormacher geh.

Doch do denkt sa mit Schrecken dra:

Sie hot ihra Arbetssachen a.

Ihr Ma is zwor wie a Pfingstochs geputzt,

doch dös hot ihr gor nex genutzt.

Zerärger könnt me sich dodrüber,

denn so muß sa morgen nuch mol rüber.

Fe morgen is sa zum Hoormacher bstellt,

da heitich Toch ihr ower besser gfällt.

Bloß is do halt a Haken dra,

sie hot ken neun Pullover a.

Fra - socht de Ma - dös is net so schlimm,

mir tauschen äfach die Pullover üm.

Dös get ganz fix, un äs, zwä drei

schlüpfst du in mein Pullover nei.

Nur wissen sa net, a net da Ma,

wu me dan großen Tausch vürgenamnm ka.

mitten auf de Stroß - do sperrn sa uns ei,

denn so a Tausch is ja net jugendfrei.

Un genn me nei a wildfremds Haus,

sieht die Sach net viel besser aus.

Do sahn sa plötzlich üm die Eck

die Zahnorztklinik beim Stappenbeck.

Jetzt werd nimmer lang rünmgepredist,

do in dan Flur werd die Sach erledigt.

Da Flur, da is fe uns wie gschaffen,

do ham die Leut net viel ze gaffen.

Sie ham nimmer lang nochgedacht

un sich sofort ans Wark gemocht.

Die Mantel wern fix runtergezerrt

un dann - dann hatten sa sich geerrt:

Denn die Haustür ging do auf,

un Leut kame die Tröppen rauf,

die gucken die Fra un a dan Ma

sehr lang un a a bißla komisch a.

Wos ham denn die do hinna vür,

in an Flur hinter de Eingangstür?

Älter senn die zwä doch a.

Vielleicht sen sa gor net Ma un Fra?

Doch die Leut genn dann verbei,

un weiter gett die Umzieherei.

Kaum sen sa aus die Ärmel raus,

kumma schö widder Leut neis Haus.

Die ham de vielleicht Gsichter gemacht.

Wos denkt ihr, wos die sich ham gedacht!

Do stenn zwä, jeder mit an nackichen Orm

(debei wors in dan Flur gor net worm)

Die zwä gucken verschamt schö gor nimmer auf.

Dös wor vielleicht a Spießrutenlauf!

Fe die zwä is jeder Blick a Qual.

Die denken sicher, die ham kä Moral.

Oder wölln die gor Stripties probier

beim Zahnortz vur de Wartesaaltür?

Öb sa mol widder gegen die Moral verstoßen??

Vielleicht tauschen sa es nachst Mol die Hosen!!!

Stellt euch sulang die Sach mol vür,

su än Hosentausch vur de Zahnorzttür.

Ich will solang mei Zunga schmier

mit an Schluck von dan worma Bier.

Wenn da Moler is im Haus,

müssen ölla Lampen raus.

Is a fertig un kümmt die Nacht,

wern sa widder nagemacht.

Manchmol is dös a verzwickta Sach,

do ka me beim Namachen ne gelach.

Zu dara Arbet wor allä unner Ma,

un die Lamp, die wor furchtbor schwaa.

A hot a kä gescheita Lätter,

auf dara a könnt naufgeklätter.

Woss will a also mach da Ma,

ä rückt sich dan großen Küchentisch ra.

Endlich stett a auf'n Küchentisch,

un die Tapet an de Deck is noch feucht un frisch.

Da Haken is klä un die Lamp wiecht viel,

un a find mit de Lamp net sei Hakenziel

An de Deck sücht a rüm ‚un ka dan Haken net gsah,

un do läfft a sei Brill nuch a.

Fast blind stett a do, fühlt sich wie a Daber,

a hängt die Lamp denabe.

Gsahn hot as net‚ ower a hots gebört,

Denn die Tischkant hot die Lamp zerstört.

Nach dan Geklirr is plötzlich still.

Aä wäß, schuld is die toll Brill.

A Wut auf die Brill pckt nu dan Ma:

"Du läffst me in Zukunft a nimmer a!"

A reißt sich die ächen Brill vom Gesicht,

un höbt sä hinterhär, dess sä ä zebricht.

Du hast die Schuld, socht unner Ma,

worüm läffst du dauernd a!

Befriedigung zieht surch sein Sinn,

senn a die Brill un die Lampen hin.

Zur Rechenschaft hot a sei Brill gezochen,

sie hat na beim Lampennamachen betrochen.

A braucht zur Zeit sei Brill a nimmer,

denn es is sowieso finster in dan Zimmer.

Von a ra anern Lampengschicht

will ich euch noch schnall bericht.

Bechlossen hot me vur Johrn in Suhl,

mir griechen endlich a neua Schul.

Da letzt Summer wor noch net ganz vorbei

do wor me schö fertig mit de Ausgroberei.

Wu die Schul heit stett, wor a ganz tiefs Loch,

Defür wor dös Kleinsportfeld plötzlich hoch.

Do türmt sich a richticha Schutthalden auf,

es Gros wächst a schön lang ohndrauf,

Öb dös mol widder a Kleinsportfeld wird?

Wa dös denkt‚ hat sich‚ gleb ich, geerrt.

Da Barch hot ower a an Zweck,

denn dös gibt a schöna Rodelstreck.

Noch laß me dös Kleinsportfald jetzt in Ruh

un wenden uns widder dan Schulneubau zu.

Denn äs, dös ka me werklich gsoch,

die Schul is gewachsen von Toch zu Toch.

Ball zogen Elektriker un Moler ei,

denn die Schul muß im September fertig sei.

Me installiert un molert drauflos,

un dös Durchananer is a manchmol groß.

Doch ball häßts : Es is heit Probelauf.

Doch, - do gett kä Fanster auf.

Am liebsten möcht me sich destach,

denn die Neonlampen sen im Wach,

Sie sen ze weit an die Fanster dra,

so deß me sa Ölla net aufgamach ka.

Dös is natürlich a verzwickta Sach,

Die Lehrer sölln nu Vürschläch mach:

Un ä Vürschloch da hieß so :

Me schraum die Lamp in de Paus ümmer ro.

Doch do mit is me net eiverstann,

weil dös schließlich net jeder kann.

A anerer Socht: Me nocheln sa zu,

do wär mit dan zanzen Theater Ruh.

Me hat dann noch viela Lehrer gfrächt,

doch de Direkter hat festgelecht:

Die Hauptsach is, deß me Fanster ham,

zum Lüften müß me halt ümmer die Scheim rausnamm

Än fätzn Durscht macht schö die Plauderei,

drüm schenk me noch ä Gläslä ei.

Die ünter HO is schö als Einkaufstreff,

do ka me zu jeder Zeit Eier gekäff.

Die meisten deva sen schö sauber un frisch,

a poor schlachte genn a mol übern Lodentisch.

Dös is normal, deß es hie un da passiert,

deß me mol a verdorms Är kassiert.

Doch neulich die Är aus de üntern H0,

die hatten mehr als Weltnivo.

A Fra hot do unten welcha erstann,

un auf n Ofen stett schö die Pfann.

Do nei wollt sa sa ölla schloch,

jedoch ganz vergeblich - laßts euch ne soch:

Sie klopft un klopft in ihra Küch,

jedoch die Ar genn net in die Brüch.

Die Dinger senn so hort wie Schotter,

kä Eiweiß läfft raus un a kä Dotter.

Sie is vom Klopfen schö ganz matt:

Mit danana Är ka me ja en deplatt.

Endlich packt sa die Wut -— un a Är

un hackts mit n großen Messer entzwä.

Vur lauter Schreck konnt sa gor nex gsoch,

jetzt wußt sa,worüm die sich net ham laß schloch.

Spiegelär hatt sa zu garn gemocht.

Doch dös ging nimmer - die Är worn schö gekocht

Dös is halt a Sörvis in Rauastä,

sowos hat kä anara Gemä.

Schö wärs, bekäm me in dan Loden

eines Tags a Klickela ageboten.

Vielleicht hot da Olieferer de gekochten Är

für nächsts Johr schö a neua Premier.

Do liefert a dann bunte Eier o,

do wär de Osterhas werklich froh.

Vielleihct möcht ihr jetzt zu garn erfohr,

wos uff die Är fe a Stempelnummer wor.

Ich wess dös a net‚ ower dös is kä Schoden.

Denn wüsst ichs, hätt ichs net verroten.

An gutn Rat ower, lieber Ma,

möcht ich dir zum Schluß gegaa.

Lieferst da widder mol Eier o,

denk dra, die Leut wölln sa lieber roh.

Un kochst da sa widier, so gab uns dei Wort:

Koch sa es nachst Mol net so hort.

Die nächst Gschicht stammt zwor net aus dan Johr,

defür is sa von Afang bis Schluß ower wohr:

In Saltendorf stand widder mol die Verkehrspolizei

un überprüft, wer die schnellsten Fohrer wölln sei.

Es wor a langer Stempeltoch

un nu is Omds, un de Verkehr 1äßt noch,

Zwä Mann ham noch Dienst un kalta Bä,

un äner is deva aus Rauestä.

Wachsam sen sa, lassen sich durch nex täusch,

un plötzlich hörn sa a Mopedgeräusch.

A Ächzen und Jaulen ham sa ghört,

als wenn äner 80 Sachen fährt.

Ja wort na, denken bäda bloß

un huln n Stempel schö aus de Hos.

Dan Sünder ham sa nu a schö degitzt.

Guckt ne‚ wie da im die Koar rümflitzt!

Da Fohrer hots eilich, a werd schö dewort,

drüm rast a‚ als wöllt me na demord.

An Gsetzesverletzung denkt a jetzt net

(Un die weißen Mäus liechen sicher schö im Bett).

Ma, deina Gedanken sen sicher sehr keusch,

doch ämol ka me sich a getäusch.

Die weißen Mäus sieht a un a rots Licht,

un ihm is‚ als wenn na jemand sticht.

Die zwä Polizisten ham unterdessen

die Gschwindigkeit ganz genau gemessen.

Sie stoppen dan Sünder mitten auf de Straß,

ds werd da ä Polizist plötzlich blaß.

Da aner guckt na verdattert a:

Du kennst wohl öbber gor dan Ma?

Un öb da aner dan Fohrer kennt --

Fe sein Vatter hot a n Stempel in de Händ.

Herrgott, is dös a verzwickta Sach,

letzt derf ich mein Vatter mit "Sie" asprach,

Es nützt kä langes Hie un Haa,

a Straf muß fe dan Vatter gfunna wa,

A wor stets pflichtbewußt un brav,

un jetzt muß a sein ächna Vatter straf,

Korrekt muß a sei, do hilft kä Getu:

An Stempel un noch 10 Mork dezu.

Da Vatter hult sein Führerschein raus,

doch domit wor die Gschicht noch net aus.

Jetzt sucht a dös Gald, ja, ja, o weh -

dehem auf n Schrank liecht es Portmonee.

Wos dann passiert is ‚find ich werklich orch,

da Polizist mußt sein Vatter dös Strofgald noch borch.

Da Vatter durft widder teilnamm am Verkehr -

ower die Aussprach dehem hätt ich mol möcht ghör!

Wenn de Schlot amol net racht,

kümmt de Schlotfacher un facht,

Wenn dann a noch nex hinhaut,

werd a neuer Schlot gebaut.

Ölla gaben sich großa Müh,

doch da Schlot, da wollt net zieh.

Da Rach, da ächentlich zum Schlot naus söll,

macht jeden Toch die Wohnung zer Höll.

Ruß un Gstank un Qualmerei -

do ka doch wos net in Ordnung gsei.

Is da Schlot denn schö widder verdrackt?

oder öb gor wos drinnastackt?

Me müßt amol von om neistür,

doch wos nimmt me halt defür.

Wenn me na wos zum Stüren hätt!

So an langa Stürer gibts halt net.

Doch halt! Dös müßt ze machen sei:

Ich schmeiß von om a poor Backstä nei.

Die putzen dös Schlötla sicher aus,

un da Qualm ka widder raus.

Net lang gezögert, äs, zwä drei

schmeißt a 5 Backstä zum Schlot om nei.

A hot ken dumpfen Aufschloch vernumma.

Sen die Stä denn net unten agekumma?

Ja, Ma, du hast dich zu sehr beeilt -

die 5 Stä ham sich fest im Schlot verkeilt.

An schön Plan hot a ghot da Ma,

doch wos hat a nu deva?

Da Ofen is nu endgültig aus

un wie kriech ich die Stä aus dan Schlot widder raus?

Es wor a langa Prozedur:

Mit an Stä hot mes probiert an ara dicken Schnur.

Gstührt hat me mit riesenlanga Stanga

Un endlich - da Ofen is widder ganga

Saht ihr - socht da Ma verschmitzt -

meine Stä ham doch wos genützt!

Auf meina Lippen ho ich jetzt a so an Rachgeschnmack,

drüm laßt mich moi an a Bierla lack.

A Handwerksmäster in Rauestä

arbet seit vielen Johrn schö allä,

Drüm frät a sich‚ wenn jemand kümmt

un na a weng von de Einsamkeit nimmt.

Doch neulich klopft a Besucher a,

mit dan a zeerscht nex agfang ka.

A weißa maus ? Wos will die denn von mir?

Die hot sich bestimmt geerrt in de Tür.

Doch als die weiß Maus dienstlich werd,

unner Mäster doch die Uhrn aufsperrt.

Wos hot da gsocht mit seiner weißen Kapp?

Ich söll als Verkehrssünder 10 Mork berapp?

Von an Stempel hot a noch wos ghört -

Nu is unner Mäster ganz verstört.

A denkt nooch un zupft sich an die Ohrn:

Ich bin doch im Lam nuch kä Auto zfohrn.

Sei Moped a schö seit langa stett,

un a Fohrrod hot a net.

Ganz saltsam is, wos da Ma ihm fürquorkt:

A hätt in Leipzich falsch geporkt.

Sogor die Stell socht na da Ma.

Es wor in Leipzich fur de DHfK.

Es nützt nex, deß a na beteuert,

a hätt in sein Lam nuch kä Auto gsteuert.

Es nützt nex, des a na beschwört,

da Polizist hot na net erhört.

Sei Nama stett auf dan Strafschein drauf,

also macht a dan Galdbeutel auf,

Un jetzt wollt da Polizist noch wiß,

wie so a Wunner möglich is.

Euch ho ichs a ganz schnell erklärt,

An dara Sach wor namlch gor nex verkehrt.

A hot tatsächlich an alten Trabant,

da löfft schö lang im Sachsenland.

Genau wäß ichs net, ower so seit 3 Johrn

werd dös Trabantla in Leipzich gfohrn.

Autobesitzer bleib wollt a halt,

drüm is dös Auto noch bei uns gemalld.

Drüm hot da Trabant, un dös is halt so,

in Numnernschild a so a richtich schös 0.

Un dös is na zum Verhängnis worn,

denn nagekriecht hot schließlich a die Schnorrn.

Fä des Autobesitzen kriecht a sein Lohn.

Denn falsch geparkt - hat sei Schwiegersohn!!