Heimatverein Rauenstein

Kirmesspruch 2023

Ihr lieben Leut, iss denn nä woahr,
schö widda iss vebei a Joahr.

Am Madich - wie´s bei uns su iss,
will doch nu jeder endlich wiss,

wos in dänn letzten Joahr su iss passiert,
wänn`s wu und wie öft a hot g´schmiert.

Ihr seid ja heit kummä, ümm a schö ze lachen,
dös Problem iss bloß – dös känne mehr a Strechlä tut machen.

In Rauestä hamme wahrscheinlich bloß anständiche Leut - öb alt öb jung,
es gab känn Blödsinn – un a känn Seitensprung!

Ober a Seitnsprung wär ja ä a heikle Gschicht,

über die ja meistens die Blind ze Ohmd bericht.

Wos ze defoahrn, woar net äfich, dös kann ich euch g`soch,
ober mir hamm heit zum 2. Kerwasdooch,

trotzdäm ä Sprüchlä fä euch zamm getroochn,
dös ich hinsa mol laut vür döt troochn.

* * *

Demit sich a jeder gscheit ka konzentrier,
trink ich fix noch a Schlücklä Bier.

Gießeträcher schenk halt äs ei,

unn dann getts los – mit däre Vürläserei.

PROST

Mit unnerä Gemäh wöll me halt beginn,
dös macht in su än Sprüchlä in mässt’n Sinn.

Unne Museum werd ä mol mehr zum Pannenprojekt,

Noch’n Fassadenschaden hott me jetzt ä noch än Schwamm im Gemäuer entdeckt.

Unn als öb dös net schö döt rächn – iss es ä noch schlimmer kummä,

unn sie hamm die Höhlenaustellung aus’n Sortiment genummä.

Ä Ersatz muss hä, do woar me sich schnell ähnich,
In Urmel sei Keller iss doch ärä Tropfstäh-Höhl rächt ähnlich.

Nooch ära Begehung durch’n Gemeinderat stand de Beschluss,

dös dää Urmel unbedingt nei Gemeindehand muss.

Über de Nutzung hott me dann ä vill diskutiert,

Unn am End hott mesch als Vereinsheim deklariert.

Öllä Vereine unter einem Dach,

fe de Gemäh iss dös a fetzen Sach.

Unnerä Vereine tun sich do ober noch a weng schwä,

su richtich kann sichs noch känne vürgstell, wie dös mol söll wä.

Trotzdäm hott mit vill Elan die Renovierung begunnä,

unn fix hott de Efeu sein Wäch noch Ehnes gefunnä.

Jetzt ka me zegoar widder durch die Fänster geguck,

unn von außen gsän, macht dös Gemäuer änn rächt gutt‘n Eindruck.

Dös Vürhamm erleit hoffentlich känn Schiffbruch,

denn Bauruinä hamme ja im Dorf schö werklich genuch.

Mir wünschen dös Beste, fe dös Objekt im Grund.

Denn: Wä schwoarz sieht, sieht halt sält´n bunt.

***

Unn zum Schluss trink me uff dänn Efeu – su vill wie gett,

unn frähn uns – dös nooch de Entsorchung de Urmel noch stett.

PROST

Ohm Friedhof hott me dös Verkehrsaufkummä reduziert,

indäm me dänn Wäch als Einbahnstroß hott deklariert.

De Grund defür iss schnell deklärt,

Es stääbt halt äfich ze sehr, wenn a Auto durchfährt.

Unn wie me dös von anständiche Rauestäne Anwohner kennt,
werd wäche dänn Dilemma natürlich gleich nei de Gemäh gerennt.

Dort hot me sich ga seeehr laaaang Gedanken gemacht - unn ä a Lösung gfunnä,

„A äseitiche Spärrung!“ – märä iss net debei raus ge kummä.

Unn wä halt jetzt fix mol sein Goarten will gieß,

ka gleich noch ä klännä Dorfrundfoahrt genieß.

Ober gläbt mesch, dös kam goar net gut a, bei unnre Goartenfraktion,

Die sochn sich - Lieber a weng Stääb, als su a sinnlose Einbahnstrooßnaktion.

Annerä Leitrochende sänn die Triniushütten-Touristen,

weil nämlich sämtliche Navis weiterhin dort ä Durchfoahrts-Strooß listen.

Me frät sich äfich uff’n Ausblick, wos gutts ze Äss unn annere Gest,

stattdessen hänge jetz öllä ärschtmol an dänn Highway fest.

Unn weil närchnts a Umleitung ausgschildert iss,

iss ä dänn Touristnä a Dorfrundfoahrt gewiss.

Su behalten zegoar die Fremmä ä bleibende Erinnerung,

än därer äußerst durchdachten Straßensperrung.

Unn dä Stääb bei dänn Anwohner geht halt ä net runter,

Weil die, die de Strooß nauf foahrn müssen ja jetz widde nunter!

Also iss dös ursprünglichä Problem ja net werklich ausradiert,

mehr, als a weng Verwirrung im Dorfalltach, iss mit därä Aktion net passiert.

Bin schö gspannt, wä de nächst Anwohner iss, dä in de Gemäh unten woar,

wämme zukünftich aufn Morktplatz wölln, müss wahrscheinlich über Robenäußich unn Möscheboch foahr.

***

Mir trinken uff die Verkehrschilder, die nur in Raustä uff de linkn Seitn stenn,

Unn hoffn, dös bei die villn Umwäch, die Benzinpreise widde a weng runter genn.

PROST

10+1 Jahre Frankenblick hamme gfeiert - ä in Rauestä,

Wos guckt de denn su feduzt – dös Fest woar fei vur 4 Wochn – ihr wisst doch wos ich mäh?

In de Kechlbahn woar Tach de offnen Tür,

oder me kunnt sich im Museum rüm los gführ.

Am Sportplatz gabs Atraktionä - unn dort hott me sich a zum wandern getroffn,

Unn ab Noochmittooch senn öllä Sportvereine in de Turnhalle zamm geloffn.

Hunderte Besucher hot me doo wohl dewort,

denn überol woar ja die Feuerwehr zum ohspärrn fur Ort.

Ober su richtich iss dä Plan net aufgegangä,

ausgebliem senn die langä Woarteschlangä.

Ganze 2 Kinner woarn in de Kechlbahn – dös iss a Wort,

Do defür woarn 18,4 Mann in de Turnhall – döt sochn:

BESUCHERREKORD!

Nuja außer im Amtsblatt woar ja von dänn Fest ä nex ze lääsn,

Ä Plakat – wär doo mol net schlächt gewääsn!

Allerdings hämm se Bänkn vertählt - in ganz Raustä,

Vielleicht woar dös de Hinweis uff dänn Fest in unnre Gemäh?

Oder hot me goar die Idee von an Zirkus koot ?

Gstrichn woarn ja die Bänkn in än klotzerichn blau und rot ?

Die Antwort kennt nur die Börchemästerfraktion,

Die wärd sich schö wos gedacht hamm, bei däre Aktion.

EGAL – dös Fest iss rüm unn wä net dort woar muss demit läb,

unn wenn ölles glatt gett und nex vergässn werd – kännts in 9 Joahrnä widde äs ge gäb.

***

Mir stoßn a uff unnerä Vereine in Raustä,

die bei dänn Fest mit vill Ehrgeiz woarn uff die Bäh.

Drüm trink ich auf euch, mir sänn ja fru,

bleibt uns dehalten – unn macht weiter su.

PROST

Dös wichtichstä ze heitichen Zeit – dös künntä gewiss,

iss äfich, wemmä uff nex unn niemanden mehr a gewiesn iss.

Von Vortäl künnt doo a noch gsei,

Dei ächna Viehwertschafterei.

Und dann ah noch am ächna Haus,

Bevur de gehst nein netto - und es Gäld dort zum Fänster raus haust.

Ä gudds Bio Gögerlä fe ähnezwanzich Euro – licht doo in de Auslach dinn,

Gratis Antibiotika inklusiv – ich gläb ich spinn.

Die Wält iss verrückt, dös säh me langsam ölla ei, unn Schuld dra wie immer -unner Politik,

und dezu die Grüna - die uns hänga im Genick.

Unn jetz kummä mol zu däre Gschicht von unnern Ma aus Rauestä,

ich döt soochn – ä iss rächt bekannt in unnere Gemäh.

Bauer wille wär – im ganz großen Stil,

von jeden ässboarn Tier, am bestn seehhrr viieelll.

S´werd kämmert und gewärklt, fe die Hünner unn die Hasen,

immer klänner werd zum sunnä, de heiliche Rasen.

Domit fängt de a,

unn zieht sich welchä ra.

Hauptsach es gaggert unn öllä senn bester Launä,

unn es fliechen jaaa kennä Daunä.

Unn es kümmt noch a poar Dooch,

de „Landwirtschaftsalltag“ su wi resch mooch.

Die Hoosen knabbern am Gemüs unn finnersch lecker,

die Hünner sänn lauder wie zäh Wecker.

Unn dä Hünnerduft werd bis nein Woold getroochn,

Genau dös richtiche fe dänn Fuchs sein Moochn.

Ä grallt sich die Hünner alle viere,

döt soochn – die hamms hinter sich, die neuen Tiere.

„Ich hör doch gor kä gegagger“ denkt sich dä Ma am frühstn Morchn,

„Muss trotzdäm äscht mol nunter guck“ denkt de sich vuller Sorchn.

Doo gette frühs nei seinä Hütt,

unn sieht wie de Fuchs hot rüm gewütt.

„Zerfleischtes Federvieh vor Ort,

Mir fählt de Glaube und dös Wort“

„Mensch wie ka denn dös blos gsei,

do steck ich Gäld unn Zeit do rei.

Käff Zaun unn bau a Haus mit Dooch fe die Tierlä,

Uff dänn Schock hilft noch nett mol ä Bierlä.“

Die Nachbarshühner ringsherüm,

Gaggern weiter und schauen sich üm.

Dä Kärl hot werklich gor kä Glück mit seinem Federvieh,

und lässts ä nochn verten Hünnerkauf äfich net gieh.

Ölla guttn Dinge senn 5, denkt sich unnä Ma unn schalt sein Handy ei,

„Hühner kaufen“ tippt de do fix bei ebay Kleinanzeichn nei.

Denn äh mücht ja strammes Vieh,

und känna Küken aus de Brühtmaschinerie.

Kä Wäch iss unnern Ma fe sein Viehzeuch ze weit,

Ä die Frä unn die Kinner sitzn im Auto nooch kürzester Zeit.

Die Fräh iss glücklich und trähmt scho vom schönen Ausflug ins Land,

doch das Auto schon nach kurzer Zeit stand.

Ortseingang eines trüben Kaffs

die Fräh blickt naus unn guggt sich üm

„Was wöll men dohier - hier gibts nex ze sähn?“

-Ebaykauf: hier woartn 2 Häähn-

Sie schüttlt mitn Koopf unn denkt sich - iss dös a Depp,

unn schö hängt se weit nunter - ihr Flepp.

„Wenn dä noch ä mol socht - loss uns mol an Ausfluch machen,

doo pack ich ober seina sieben Sachen.

Do kare gschloff bei seina Viecher wie re mouch,

Su kumm ich a zu meina Urlaubsdooch .“

Dehämm a kummä gibt’s äschmol ä Bierlä,

ä gscheiter Schluck auf die fedrichen Tierlä.

Die Fräh unn die Kinner wärn unterdessen dehämm ohgsetzt – „Ich kumm ganz bald ihr Lieben Leut,

doch nu will ich kä Zeit vegeud!“

Bei dänn Bierlä unn dänn Gelaber mit annerä Leut,

werd meistens ganz schö vill Käs gekeut.

Do kam nä die Idee im Nu,

Doo passen doch a Schoof dezu ?

Wahrscheinlich flippt die Alt dann fulnze aus wie ich se kenn,

doo brauch ich dann überhaupt nimmer hämm.

Gesagt getan und eins zwei drei,

Do kama scho die Schoof herbei.

Ober ä dä Stromzaun helt die Zwä net auf,

unn su nimmt dös Drama halt sein Lauf.

„Dänn Maah dänn gäb me die Fuhr“-

Und schö ging sä los ihr Tour.

Die Schoof springä hoch – die Schoof springä weit,

worüm a net – sie hamm ja Zeit.

S´klingelt sei Handy – unner Bauer, wie immer unterwegs,

„Herrgott“ wä gett me denn jetz schö widder uffn Keks.

De Nachber iss dra:

„Deina Schoof senn ja ab – mir hamm se gsähn wie se nein Woold senn geloffen.

Ach ja unn wemmä ämol debei senn – auf deinä Hünner brauchstä ä nimmer ze hoffn.“

„Die hot sich nämlich grad de Geier kullt in öllä Ruh,

wos sechstä dänn jetz widde do de zu ?“

Aufgelecht unn ab nein Koarrn,

Größer unn größer woar ober sei Zorn.

Ahkummä tief im Walde Richtung Steinheid -

Ihr künnt nä verstieh - ihn unn sei Leid?

Eigfanga hotte die zwä ja trotzdäm rächt schnell,

…ahgepackt am Bauch und hoch es Fell.

Ab nein Hänger unn runter nach Haus,

von euch gett überhaupt känner mehr naus.

Lieber Bauer, sei nicht sauer!

Gib nicht auf, und verlier nicht den Mut,

Ein erneuter Versuch ist immer wieder gut!

***

Mir trinkn uff unnern Bauer unn sein nächstn Versuch,

klänner Tipp – wenns widde nex werd

Käff de a „WIE WERDE ICH ERFOLGREICHER VIEHBAUER“ Buch.

PROST

An än Sunndich Ohmd sitzt me in än Wirtshaus dinn,
dös macht zum Wochenausklang in mässtn Sinn.

A poar Bier, äweng dumms Gekeu, äfich heile Welt,
bis die Klingel von än Handy schellt.

„Hälf me, sünst stärb ich“,
su fing die WhatsApp Nachricht a.

„Du host doch die Tropfen die ich brauch,
wie schnell kümmstn doo na!“

Unner Retter in de Not trinkt fix sei Gläslä aus
und sucht dehämm ÖLLÄ möchlichen Tropfen aus’n Apothekerschränklä raus.

Autofoahrn kümmt jetzt nümmer in Froch unn zum Läfen iss ze weit,
Bleibt bloß noch dös Foahrrood, egal, dös draußn stürmt und schneit.

Nooch kurzer Zeit ohm in Möscheboch a gekummä,
werd de Patient mopsfidel mit sein Nachber un änn Bier in de Händ vürgfunnä.

Fix kummä die Tropfen-Fläschlä aus däre Taschn raus,
un unner Bedüfticher sucht sich dann die Richtichen aus.

„Mir dürfen jetzt kä Zeit mehr verlier“ -
spricht’s, schraubt in Deckel runter un schütt des Fläschlä nei sein BIER!

Die annern künnä ihrn Ächnä kaum getrau,
woar des jetzt dumm, mutich oder ämend zegoar schlau?

Dös Gläslä wird fix ausgtrunken,
un me gläbt’s net – Minut‘n später sänn die Beschwerden verschwunden.

Wos söll ich jetzt noch dodezu sooch?

Wenn’s mol im groß’n Fußzeh sticht,
dann stärbt me net - dann hott me Gicht!

Unner Patient hott sich bedankt bei sein Retter ganz geschwind,
sie hatten zesamm ä gutt’s Ässn – passender Weise än schön fett´n Spint!

***

Gießerträcher, mei Fuß kribblt jetz uff ämol ä,
gäbb me doch fix mol su a Allopurinol-Mischung hä!
PROST

Bei uns uffn Dorf gibt’s ungschriemnä Gsetze -

an die me sich söll halt,

suzesooch‘n in „Rauestäne Knigge Katalog“ -

döss Benimmbuch für jung und für ALT.

Ümmer schö Grüß un annernä hälf, wenn’s mol zwickt im Knie,

Dös kört äfich dezu - un wemme ehrlich iss – tut´s ä kenn wieh!

Liebe ääämol ze vill hie geguckt unn hie gehört, es künnt ja gsei,

me werd mol zum Hauptdarsteller in änner Kerwasspruch-Reimerei.

Unner Ma iss in Rentn unn hot sich dös genau su gedacht,

dös wennä ab unn zu zum Fänster naus guckt – a noch a poar spannende Beobachtungä macht.

Ä krätscht in sein Gorten rümm und find ne su richtich sei Ruh,

„Sochemol wos brummt denn uff de Strooß do vornä su??

Kä Baufoahrzeuch un kä Heckenschä weit und breit,
dös wä suwiesu a Frechhäd ümm däre Mittochszeit.

De ICE kas a net gsei – da is scho lang über’n Grümpental drüber,

do guck me doch mol beim Nachber nüber.

Dös isses - do stett a fremms Foahrzeuch vurn Haus!

Ich wär sein Besuch mol soochn: „Seid su gut unn macht euer Autola aus!“

Beim Nachber a kummä werde ober schnell enttäuscht,

dös fremmä Auto läfft mit „E“ unn macht im Normalfall wäng bis goar kä Geräusch.

Die Stunn genn vorüber unn dös Gebrumm iss laut wie nie,

Gleich langt’s - denkte sich und hört bei jeden Geräusch ganz genau hii.

Ä iss nu schö im ganzn Haus rümgetappt unn hott noch dänn Brummä wöll süch,

ober ä find nex – net mol bei seinä Frä in de Küch.

Wos a immer dös iss, denkt sich unner Ma,

do soll des Scheißding halt brumm – es gett mich ja nex a!

Ä find sich mit sein Schicksal o, de Mensch iss ja eh a Gewohnheitstier,

Ärchendwänn werd’s scho aufhörn – ich trink äschtmol a Bier.

Uff ämol läuts an seiner Tür – „Wä mooch denn dös jetz sei?“

In Nachbe sei Besuch isses - ämend iss ja dää Krachmacher mit debei.

Mir wölln dich net aus deine Ruh raus reiß,

Ober dös Geräusch kümmt aus dänn Auto do - unn iss dös net DEIS?!

Kreidebleich unn wie vom Blitz getroffen stett de dort,

„Stimmt ja – ich woar vura noch kurz mitn Auto fort!“

Dä Ausflug iss scho ä Zeit lang hä, dös secht sei Uhr.

„Also woar ich jetz die ganz Zeit mir sälber uff de Spur???“

Ober me muss dezu sooch - IM Auto woar‘s defür rächt leis,

weil zemindest beim Radio hotte gfunnä - dänn runden Ausschalt-Kreis.

Dös de Motor su lang lief, muss me dänn Ma dann ober doch verzeih,

Denn wächä die Stromkosten kummä die neuen Hörgeräte nur noch rächt sälten nei.

Wichtig iss ober, unn dös stett a im Rauestäner Knigge dinn:

Hörgeräte machen in de Schachtl wäng – unn im Uhr defür vill märrä Sinn!

***

Mei Schädel brummt jetz ä scho wie die Sau,

unn im Moochn, iss mesch ä schö rächt flau.

Soch mol Gießeträcher, du hörst me überhaupt noch zu?

Gäbb me an Schluck von dein Kaltgetränk, dann hosta widde dei Ruh!

PROST

So… Mehr gibt’s heuer net vür ze lääsn,

dös wäche woars dös jetz gewäsn.

A poar Leut´ muss ich ober noch benenn,

Weil ohne die - döt gornex genn.

Also kümmt als Letzts - wie sölls annersch sei,

die KERWAS-HOCHLÄBEREI.

Hoch läb sölln:

- Die Gemäh ober vur ölln de Bauhof unn öllä seinä Mitarbeiter sölln hochläb.