Heimatverein Rauenstein

Kirmesspruch 2022

Schö dös de öllä do rinter seid geeiert,

unn mit uns zammä die Rauestäne Kerwä feiert.

A Spruuch am zwättn Pfingstfeierdooch,

Kört äfich dezu - do gibt’s kä Frooch.

Mir wölln a bisslä wos zum Bestn gäb,

unn am End noch a poar Leut hoch los läb.

Drümm will ich jetz an alt vertrauter Stell,

euch wos von die letzten Joahr dezehl.

Jetz hamme schö widde 2 Joar Pandemie,

ober mir frähn uns, dös me heuer nu endlich widde do dürfen stieh.

Lang genuch is ja die Zwangspaus gewäsen,

nu mehr werds Zeit dös me mol widde ä Sprüchlä vürläsen.

Ich hoff ihr kennt noch die Leut, die su näbe euch stenn,

denn Gsechter verändern sich ja, wenn zwä Joahr kännä Kerwa senn.

Üm nochmol kurz auf dänn „Schnupfen“ zerück ze kummä,

dä hot die Menschhät ganz schö mit genummä.

Su richtig wess nämlich känne, wu wos gilt – unn fe welchä Leut,

denn aus die Medien, werd me ja stündlich mit neun Zeuch vull gekäut.

„ Do däff me nur mit Mundschutz nei,

wenn ich neis Kino will, muss noch fix ä Schnelltest sei.“

Weihnachten hock me öllä ällä unterm Bähm,

unn ä Feuerwerk ze Silvester werds,

außer in Zimmermannshausen,

ä net gähm .

Ausgangssperre unn Kontaktverbot,

hot me ja nu ä ze genüche koot.

Un weil unnerä Nachberländer fast ölles Risikogebiete

sänn,

bleib me halt ä noch im Urlaub mitn Orsch dehämm.“

Ober de absolut Hammer woar 2020 – man glaubt es

nicht,

do hostä in känn Laden mehr äboar Nudeln oder

Scheißpapier kricht.

Ää Päcklä durfts nur pro Haushalt sei,

do musstä bät, dös dä net krichst die Scheißerei.

Jetz löfft dös ölles äweng annersch oh,

me muss halt nur ä Impfung hoo.

Biontech, Moderna, Johnson & Johnson, ich wess schö…..lauter Experten in Sicht.

Ober ze DDR Zeiten hot me im Endeffekt ä net gewisst woss me kricht.

Do drüber will ich ober jetzt net märrä sooch - dös wird sünst zeviell,

unn außerdäm kann dös ä jeder gemach wiere will.

In ärschten Schluck züll me uns jetzt nei,

unn dös söll unner Trinkspruch sei.

Grenzen dicht, Regale leer.

Willkommen in der DDR.

Prost

Lang hamme uns ja schö nimme zamme gfunnä,

unn sänn deswäche goar net zum DANKE sooch’n kummä.

De größt Dank gett heuer nein öbern Durf – unn gläbt mesch, dös dut sich lohnä,

dös iss nämlich do - wu unnerä Heinzlmännlä wohnä.

Die haltn nämlich unner Dörflä ringsrüm in Schuss,

sünst wär nämlich mit schönne Wanderwäch unn Sitzgelechnhätn Schluss.

Zegor an Großauftrach hamm se sich zugetraut,

unn hamm uns dänn wunneschönn Tanzboodn do hä gebaut.

Dös neustä Projekt iss wess Gott net ze übersähn,

ich gläb su a Eingangsportal dutts nur im Jurassic Poark gähm.

An de Grössn muss me sich äscht noch gewööh,

ober ansünstn, wie ölles von die Heinzelmännlä, wunnerschöö.

Die haltn wängstns wos se vesprächn – auf die iss Veloss,

im Gegensatz zu mancha Vesprächn ausn Äffeldä Schloss.

Do unten hot nämlich de Köpper fix mol die Bieche gemacht,

unn hot’s tatsächlich zu än „Hauptamtlichn Beigeordneten“ im Landkräs gebracht.

Dös Nochrück’n hot ja dann a su einichermaßn funktioniert,

unn die Gemäh Frankenblick wärd jetzt von ärä Frä regiert.

Sälbä Partei, sälber Ort – dös iss schömol gewiss,

„Hmm ? Ich such jetzt noch in dänn Satz die Stell,

wu wos besser iss?!“

Dös Volk hott gewählt, unn domit stand fest,

dös unne neuä Börchemästerä net Zinner, söndern leider Müller-Gothe hässt.

Seitn Amtswächsel an de B89 im Schloos,

Woar ja mit Sprüchlesvürläsen noch nex widde loos.

Jetz sooch ich mool su ganz vermässn,

„Frau Müller Gothe“ bei uns wärd fei ächentlich nex vergässen !

Bevur me ober jetzt a weng in de Gemäh rümmstürn,

döt ich mich fix noch fe än Schlücklä Bier intressiern.

Su ze sochn – die Stimm a weng öl, dös me mich a gscheit verstett,

es interssiert ja bstimmt jedn, wos in de Gemäh su vürsich gett.

PROST

Unner Gemäh hott nämlich än nochl neun Traktor eigekäfft – su richtich fett.

Worüm unn wiesu – dös wissen se wahrscheinlich sälber nett.

Ober äs werd noch de Begutachtung ganz schnell kloar,

Nämlich dös dös Ding mit känn äzichen Gemähhänger darf foar.

Jetz müssen die Hänger sinnlos im Bauhof rüm stieh,

me kann ja a net vurn Kauf gewiss, wos su ä Traktor muss zieh.

De Ümbau, dös die Hänger widde passn döten, hett gläb ich dös Kraut a nimmer fett gemacht,

ober unner Börchemästerä hot sich do de zu mol wos ganz bsondersch ausgedacht.

Dös Gäld fenn Ümbau dumme uns nämlich spoarn,

do werd de neu Traktor halt äfich su rüm gfoarn.

Unn wenn Hänger halt nur rümm stenn kostn se Gäld,

ober wos söll de Geiz – verschleuder me se naus de Wält.

A fätzn Gemöhr hatt me – döss iss goarnet ze sochn,

unn do de bei gings äfich nur üm än Scheisshauswoochn.

Dä iss nämlich aus Versähn mit nei dänn Verschleudertopf kummä,

unn hot ä noch zufällich än neun Besitzer gfunnä.

Wu stand denn dös mit dänn Scheisshaushänger – dutt doch mol äs a Frankenblickblättlä hä,

Muss net Gemähächntum öffentlich ausgeschriem wär ?

Sicher bin ich mir net, doo will ich mich jetzt net ze weit ausn Fänster lech,

ober me hett ja wengstns mol die Vereine künn gfrech.

Doo wärnse doch a gebraucht unn sicherlich hett sich äne gfunnä,

dä sich dänn Scheisshauswoochn hett a genummä.

Unn wahrscheinlich hetten ne a noch die Vereine saniert,

ober an su wos iss ja unner Gemäh überhaupt net intressiert.

Dös Gezärr mit dänn Hänger hot ober scheinboar die Rundn gemacht,

unn wurd gleich in äre Gemeinderatssitzung a gebracht.

Im freien Wort stand allerdings a weng ä annere Version,

kümmt halt immer drauf a, wä de Informant iss von däre Redaktion.

Wie ä immer -

Jetzt kört de Hänger widde de Gemäh – frecht mich net wie su wos läfft,

wahrscheinlich hamm se nä a noch fenn doppltn Preis zerück gekäfft.

Mol drüber geguckt und frisch TÜV gemacht,

stett dä Woochn nu doo in voller Pracht.

Unn fe nächst´s Joahr kann sich die Gemäh mol überlech, wie se do a drittä Tür nei wölln bräng,

Ihr wisst schö – fe die, die net su richtich wissen wos se sänn.

Su a Aufrechung fur de Kerwa wäche an Pippi unn an Schiss,

braucht me ä net jeds Joahr – dös künnte gewiss.

So Leute – wuus jetzt läfft, iss mir egal,

Gieseträcher - schenk äs ein sünst werds noch schal.

PROST

Wenn Leut scho ewich veheirat senn,

passierts, des sä sich imme ähnliche wärn.

Do wess de ä scho devur, wos de anner will sooch,

fe mein Gschmack fast scho a weng langweilich, ohnä Frooch.

Mei nächsta Gschicht hannelt von Rauestäne Poar,

wos ä scho lang veheirat woar.

Obe die Zwä lääm net im Gleichklangtrott,

a jede noch sei Ächnoart hott!

Unnera Zwä gänn sehr gärn nei de Nadur zum Wandern unn machen sichs schö,

unn ämmol kumme sä von Ausfluch zerück –

vebei an de Lautere Höh!

„ Ach Frä, do fellt me doch grade ei,

ich müsst nochmool nein OBI nei!

Unn bei die Preise vom Benzin,

tät sich’s fei lohnä - mir foahrn jetzt gleich noch hin!“

Also wärd im Kreisl oogeboochn,

unn vurn OBI gepoarkt de Ausflüchles-Woochn.

„Wässt wos?“ secht die Frä „do macht’s doch ä Sinn,

wenn ich sulang fix nei de Edeka spring!

Des gett ruck zuck – ich brauch ja net vill, aweng Gemüüs unn Papier fersch Kloo,

gieh du nei dein OBI unn mir träffn uns gleich widde doo.“

Su weit su kloar, doch jetzt fellt unera Wanderin ei,

sieht hott ja goar känn Gäldbeutl debei!

Drüm kramt de Maa nu in sein Portmonee rüm,

unn kann mit Müh unn Not noch 30 Euro dinna gfinn.

„Schatz, nämm du des ganzä Boargäld ruhich amool,

ich kann doch beim OBI mit Koart bezoohl.“

Su klappt also doch noch ihr Plan an dänn Dooch,

unn a jede gett seinä Besorchunga nooch.

Ihr wisst wies is, wenn ä Frä eikäffn gett,

un kä Maa drängelnd hindere stett?

Unn dezu noch des Buchhalter-Härz von unnere Frä,

macht re die Sach nu doppelt su schwär:

Sie jongliert ihrä Sachn uff die Oarm su gut wie‘s gett,

weil an Wochn hott sä ja nett.

Galant schleicht sä su von Gang ze Gang:

Ihr Köpflä rächnt wie a Maschinä gleich ölles zamm!

Su gett sä mit Ehrgeiz nei die Vulln,

des Maximalä rauszehulln.

„Ach do kann ich ja noch dös, unn hier, dös ää,

unn die Marmelaad dehämm woar doch ä ball läär.

Nex will sä vegeud, uff nex vezicht,

an de Kassn werd’s re dann obe trotzdäm mulmelich.

„Hoffentlich ho ich mich jetzt net vetan“

mit jedem „Piep“ is re ihr Härzla nan Hols na gschlaan.

Am End strahlt sä stolz übers ganzä Gsecht,

weil die Kassiererin tatschlich „29,99 €“ secht.

Euphorisch trecht sä ihra Taschn naus unn sucht ihrn Maa,

dä stett grad fuchtelnd wie a Wille an de Dönerbudn dra.

Mit Händ unn Füss, die nei öllä Richtungä gänn,

als wille ä Boing 747 zum Eipoarkn breng!

Dobei helt’ä in de änn Händ an Döner, mit de annern winkt’ä sei Frä ze sich raa.

Dann secht’e MUMFLND: „Kie, gäb me mool fix 5 € fe dänn Maa!“

Unnere Frä falln vur Schreck die Tütn aus de Händ:

„Ha Maa, ich hoo doch nur noch änn Cent!!!“

Jetzt dämmerts unnern hungrichn Ässe uffamool,

dösse sein gepumpten Döner su net kann bezoohl!

Dos DIE obbe ä net mool 5 € widde aus dänn Ladn mithotgebracht,

Dös hottä von seine Frä su a net gedacht!!!

Tja jetzt is gutte Rat teuer, sie überlechn hin unn hä unn hamm weiß Gott noch ä Lösung parat,

im OBI gibt’s doch ä noch änn Gäldautomat!

Dös dä jetzt von änne ganz annern Bank is, is jetzt werklich net von Belang,

Är hullt Gäld und bezoohlt seina Schuldn beim Döner-Mann.

Trotzdäm is nä aweng nein Nääslä gschossn,

dos nä sei Frä su därb im Stich hot gelossn.

Unn a Woch drauf wird die Stimmung widde nein Käller gelenkt,

Als de Poster änn Brief mit die Kontoauszüch brängt:

6,95 € Abhebegebühr!!!

Bei unnern Wandere trätn schö widde die Holsschlagadern für!

Su hott unna Ma ohna es ze wissen,

vurn OBI in Coburch nein teueschtn Döner öller Zeitn gebissn!

Un gut woar re ä net – des kunnstä vull vegäss,

denn weil des Fladnbrot aus woar, musst’e a nooch su an Rollo-Floarn fräss!

Wos lärn me nu aus däre Episod?:

Hott sich die Frä im Edeka veloffn

Brauchstä draußn net uff Wechslgäld ze hoffn!

Kie Gießeträcher schenk ruhig schömool schöö vull,

ich bezohl a gleich, muss bloß erscht mei Frä/Maa defür hull!

Wiesn sänn meistens zum ohfrässn doo,

wä Viehzeuch hot, blocht sich doch net mit änn Rasenmäher oh.

Do kummä zegoar mol Schoof aus än annern Ort – dös künnte gewiss!

Weil dös Möschebocher Groos halt äfich am besten iss.

Loss in unnerä Gschicht su 20 oder 25 Schäflä gewässn sei,

die häähm sich uff äre Möschebocher Wies ihr Ahmbrot nei.

Am spätn Ohmd, die Bäuch sänn full,

wölln die Bsitzer ihrä Schoof widde hääm uff Robenäußich hull.

Ähne läfft ganz hinten dra,

unn a Auto fährt vornä wegg – domit kä Schoof ausgebüchs ka.

Uff de Höh vom Baumanns Hubert hört me dös Schrein,

„Komm, Komm“ – dös ä öllä Schoof schöö zammä bleim.

Uff ähmol flicht a Gatter auf,

unn unner Gschicht nimmt doo sein Lauf.

Dös „Komm, Komm“ iss bis nein Hubert sein Schoofstoohl nei gedrungä,

unn schö hamm sich uff däre Strooß ZWÄ Hädd´n zamme gfunnä.

In Hubert sei Heidi iss ganz aufgerecht,

„Wie krich ich denn unnerä Schoof widde hämmwärts bewecht?

Mir müsstn sä trenn vom Robenäußicher Rest,

dös iss ober goarnet su äfich, weil ä Schoof aussieht, wie dös annerä hässt!“

Do fellt de Heidi dä rott Futterähmer ei,

wenn dä nämlich gschüttelt wird, gänn die Baumannsschäflä widde nei.

Doch a dä Plan gett net su richtich auf,

Sie schüttelt dänn Ähmer – unn 40 Schoof störzn sich drauf.

De Hubert muss hää, de hellt se in Zaum,

wos goarnet su äfich iss – denn dä sitzt bei änn Dokte im Warteraum.

Die Heidi ruft ne a – unn schildert die Sach,

ober wos söll denn de Hubert vom Dokte aus mach ?

Die Anweisung vom Hubert woar:

„Stell´dich nei de Hädd´n nei,

unn schalt von dein Handy inn Lautsprächer ei!“

Uff ähmol plärt aus dänn Handy a „K-O-O-OMM,

K-O-O-OMM“ – unn ringrüm dunn schö öllä feixn,

ober me gläbbts net - uff ähmol trennt sich die Spreu vom Weizn.

Die Möschebocher Schoof spitzn die Uhrn unn stenn sofort Spalier,

unn die Heidi kann se in Vormation durch ihrn Hoftur dirigier.

Unn nooch a poor Minuttn sänn in Hubert seine Schoof öllä widde de hämm,

unn die Robenäußicher Häddn tut jetzt „LAUTLOS“ ihren Wäch weiter gänn.

KOMM Gieseträcher KOMM, füll mein Futtertrooch nochmol auf,

dös me uff unnern Möschebocher Schooofsflüsterer äs künnä gsauf.

PROST

„Schenken macht Freude“ is des Motto von mein nächstn Spruuch,

obe beginna tut die Gschicht mit an „Zahlungserinnerungsgesuch“!

Ihr künnt’s euch vürgstell, des langa Stenn gett unnere Bäckerin auf die Knochn,

in an Katalooch werd re nu Linderung vesprochn.

„Laufen wie auf Wolken“ stett doo „mit Schuh von Bong Bricks“,

wie wenn dä schwebst – do drückt unn zwickt nix!

Odde uff Rauestänerisch: „Lääfn wie uff Blääächsämml“ kannstä in dann Fall ä gsooch,

halt die von heit, net von an annern Dooch.

Die Schuh wärn gebraucht unn hinza bestellt,

schö freundlich in beige, wie’s unnerä Waltraud su gfellt.

An dänn Dooch wu de Poste des Paket von Bong Bricks bei re nei will reich,

herrscht ober grad Rush-hour im Zimt*otzen-Verkaufsbereich.

Drüm werd die Sendung fix achtlos nein Hausheern nei gstellt,

„ich kann ja späte in Ruh geguckt, wie me die Lieferung gfellt.“

Ober dann is re des Paket vullends ausm Sinn gekummä,

unn ärscht mit de Mahnung werd die Spur widde aufgenummä:

„A Mahnung??!! – nä! Des kann net gsei!

Ich bezoohl immer sofort unn eimannfrei!“

„Obe die Schuh…“ erinnert sich langsam unne Frä, „stimmt, die hott de Poste doch vur Doochn scho hä.“

„Dös gibb’s doch net, in dänn Paket woar siche a die Rächnung noch dinn,

me muss doch des Päcklä dohinnä widde finn!“

Jede in dänn Haus sucht nu dänn Karton,

doch die Gesundheitsschuh von de Waltraud sänn auf unn davon.

Me zweifelt dann fei langsam an sein ächna Vestand,

unn sie find die Sach schö lang nümmer amüsant.

Wos söll sä noch mach, vur lauter Schreck?

De Fleckrä is vemutlich des neue Bermudadreieck!

Also werd die Sucherei eigstellt, unn des Objekt offiziell als veschollen erklärt,

als durch an Anruf des Thema ä unerwoartä Wendung erfährt.

Aus de Georgiistrooß vermäld ä Frä an seltsamä Fund am Telefon:

Un zwoar uffn Geburtsdoochstisch von ihrem Sohn!

Dä hott nämlich sein Kinnegeburtsdooch gefeiert vur a poar Dooch,

unn dä riesen Diisch vulle Gschenke stett bis heit noch.

Nooch unn nooch dutt dä Klää seinä Gschenke auspackn unn inspiziern,

unn kümmt bei än Päcklä ganz oarch ins Sinnieren:

Weder Lego, Eisenbahn noch Torwoarthandschuh,

sondern a Poar beigä, orthopädischä Damenschuh!!!

Do demit ka dä 5-Jährich grad goar nex aagfang

Unn bläkt ärschtmool die Wohnung zamm:

„MAAAAAAMAAAAAAA kumm‘ emol zu mir,

unn guck emol – des schenk ich dir!“

„Ha Kind wos is denn dös ferä Karton? Unn wü kümmt dä denn hä?“

Obe Dank de Rächnung is die Antwort ja goarnet schwär!

Obe wie is dä Karton vom Fläckrä nei de Georgiistrooß kummä?

Ha! Des Enkelä hott nä uffn Kinnegeburtsdooch von seim Kumpel mit genummä!

Ä stand su im Hausheern und zieht sich grad sei Jäcklä aa,

doo grinst nä dä riesen Bong Brix - Karton su schö aa.

Unn weil är find, sei Freund vedient mehra als nur ä Gschenk,

hotte sich flux dänn Karton untern Oarm geklemmt.

Su kunntä sein Kumpl reichlich bschenk un betu,

unn sei Omma dehämm kriecht gratis a Suchrätzl dezu!

Gießeträcher host kört?: Schenkn macht fruh,

dös is fei übrichns a beim Eischenkn su!

Also mach de doch bitte selbä a Fräd,

unn schenk schöö vull mei „Bier-Trooch-Gerät“!

PROST

Unn bevur me jetz dös Tanzbä schwingä,

kummä noch zum Loblied singä.

Die Leut hamms verdient unn die muss es ä gäb,

dös wäche wöll me sä ä hoch los läb.

Hoch läb sölln:

- Die Heinzelmännlä sölln hochläb, … mir hamm fast schö a wenig Angst vurn nächstn Projekt.