Kirmesspruch 1993

Seid me gegrüßt ihr ölla do,

mir senn a heuer wieder froh,

döss zu vill Leut än Spaß dra hamm,

un här zu unnerä Kerwa genn.

Am Matich – dös is ja wohl klor,

wölln öllä unner Sprüchlä hör.

Wos ham mir heuer uns geplocht

bis gestern noch nach Sprüchlä gsücht.

Doch äh die, die noch su heimlich senn,

tun heit uff unnern Zettel stenn.

Ä jeder wärt un mücht gewiss,

wär heuer in dänn Spruch drin is.

Bloß zu än Streich – su rächt aus voller Brust,

hott heitzetooch kaum änner Lust.

Dös woar halt de Martel ihr Plessier,

die woar de richtig Mensch defür.

Sie hott in ihr’n Läm sehr viel gelacht 

und mit annernä än Spaß gemacht.

Sie woar ä richtigs Original,

su ännä gibt’s halt kä zwetts Mal.

Dös woar die Vorred – dodemit is genüch.

Jetzt kummä me zu die ächentlichen Sprüch.

Drüm Gießerträcher guck net su,

gäb dän Bier do drin kä langä Ruh.

Denn will mä laut un deutlich läs, 

muss me ä a Schlücklä äß.

Wenn me sich rümguckt in de Wält

me kriecht fast ölles für sei Gäld.

Un wenn me will, goar noch neis Haus,

Me braucht noch net emol mehr naus.

Un dess dauernd a Vertreter kümmt,

dös ham mir ja früher net gekännt.

Vur Johrnä woar’s ja noch viel schlimmer:

Die Teppichhändler, Eismannmänner,

die Topfverkäffer, Luftbildermacher, 

die Kaschmirbetten-Kaffeefoahrer,

sie ollä hamm ihr Gschäft gemacht

un sich über uns neis Fäustlä gelacht.

Beate Uhse, Otto, Quelle

sie ölla woarn sofort zur Stelle.

Sie wissen, wos uns heimlich quält,

un uns zum innern Glück noch fählt.

Ä Mah aus unnern Unterland 

kriecht äh a Ladung zugesandt.

Die hott äh werklich net bestellt – 

es gett schö dumm zu uff därer Wält.

Beim Hosenfüttern stett dä Mah

un guckt grad seinä Matzern a.

Du tut’s än Knirscher un es knackt

als öb grad äs sei Hulz zerhackt.

Ja socht emol, dös gibt’s doch net,

wenn ich nä bloß mei Brill uff hätt.

Mir is doch grad als stett do ohm

ä Auto von de Kaiserdom.

Ä Auto – ganz un goar vull mit Bier

stett do vur seiner Kellertür.

Obwohl är goar kä Einfahrt hott,

stett wie hiegestellt die Bierscheß dort.

Die kam grad von de Stroß geflochn

weit hot’s sä ober net getrogen.

Die Haltungsnoten ober woarn rächt gut - 

es waor kä äzichs Bier kaputt.

Dä Zaun is hie – die Mauer äh,

vom Stiggel brößeln roo die Stäh.

De Fohrer guckt grad wie a Schof,

un wäss a net, wos är nu söll soch.

Ä langer Kran muss hälf diesmol,

beim Rauastäner „Mauerfall“.

Dös Auto is scho wieder hägerecht woarn,

un tut weiter fleißig Bier ausfoahrn.

Die Mauer allerdings is noch ä Versicherungsfall

un wird ä gebaut wärrn – ergendwennmol.

Dä Mah überlecht scho, öb är a mol dicht

un an Spruch sulang an seine Bruchstäh picht.

Mir is do sofort äne nein Sinn gekommen:

Wir wollen, dass Sie ihr Bier bekommen.

Vom Bier nur zu plaudern is bestimmt net gut,

mei Stimmlä ja scho knistern tut.

Ja überhaupt muss ich mol sooch, 

ho ich dänn Eindruck, heitzetoch,

kriecht jeder, dä nä Geld awänd,

sei Foahrerlaubnis nei der Händ. 

Dä Paragraph Äs, dän me früher müsst wiss,

fä vill heit ä groß Geheimnis is.

Un ohnä Rücksicht auf Verlust,

fährt mancher raus sein ächnä Frust.

Annerä müchen ä noch Analphabeten sei,

denn am 30-Schild foahrn sä mit 60 vorbei.

Dann gibt’s noch welche, die senn däb uff die Uhrn.

Do hört mä nur die Bäss, wenn sä in Dort nauf foahrn.

Grad vur a poar Wochnä host su änn dewischt,

als är widder mit Karacho noch Möscheboch zischt.

Do ohm bei de Villa kümmt Gegenverkehr,

vur Schreck setzte gleich sei Scheß verquer.

Un fährt frontal nei därer Heck,

dass de Eisenzaum im Bodenbläch steckt.

Ä selbst kümmt mit’n Schreck defa,

doch dös stört nä wenig, dänn jungä Ma.

Die Polizei is ä noch kumma

und hott dänn Fall fix aufgenumma.

Jetzt socht me nä nett, dess änner drauf baut,

dass die Polizei dümmer ist, als erlaubt.

Von däre Sort gibt’s ämend goar känn mehr,

denn där do ohm woar geschäftigtüchtig sehr.

Kaum woarn öllä Splitter zamm geräumt,

do legt är los als hett är‘s versäumt,

Un biet als Trost dänn jungä Ma,

sein ächnä alten Lada zum käffen a.

Des schlächt in Fooß in Boden raus,

doch die zwä machen sich nex draus.

Kampf gegen Dümmheit brengt nex ei,

drüm will ich lieber ruhig sei.

Ho ich än Durscht – is dös a Hitz,

losst mich net im Trucknä sitz.

Ä Klo mit änner ganz neun Tür

is nu de alten Schul ihr Zier.

A Lehrerin, die’s eilig hott

gett in des Paus zum stillen Ort.

Sie macht ihr Geschäft und wend sich nu,

in Gedanknä ihrer Klass scho zu.

Doch wos is döss – sie werd fast verrückt,

dös Türschloss net ä Stückla rückt.

Sie rüttelt, zerrt un stampft un pucht,

vergäblich, wos sä ä versucht.

Ja hälft me nä – ich stieh’s net durch,

bin eigsperrt wie in änner Burg.

Su lammetiert sä un sie schwitzt,

derweil sä uff dänn Deckel sitzt.

Un agelockt von dänn Geschrei,

springt ä de Waldi scho herbei.

Doch dä gutt Ma hott ä kä Glück,

es get net vürwärts noch zerück.

„Die spreng me frei, dös wär gelacht!“

hott änner scho sein Jux gemacht.

Dä Waldi hott indes sich besunnä,

die Tür ganz ausänanner genummä.

Jetzt kricht die Frä erscht widder Luft,

ihr ganzä Angst ist wie verpufft.

Dös Beispiel zeigt uns wieder gut, 

modernä Technik fordert ihr’n Tribut.

Drum Gießerträcher schenk noch ei - 

dös söll doch heit die Handwerk sei.

Ä unner Dorf kümmt net drüm rüm,

me baut vill aus, un neu, un ümm.

Mir hamm än neun Marktplatz mit Brünnlä un Beet,

an dän unten dra de Ritter stett.

Stett kann me goar net gsoch, är rutscht ja mehr zamm,

su dass me bald ä an neun Müllhaufen hamm.

Am Schönberg, gleich üm die Eck do ohm,

hot me fast a Joahr lang rümgegrohm.

Me hot nä verkabelt un neu angeschlossen,

die Baustell is inzwischen wieder verlossen.

Dä Wäch woar ja früher scho a Graus,

oder hinzä sieht’s wie noch än Berchrutsch aus.

Grad wie me nu do ohm rüm hot gewühlt,

is ärer Frä wos dolls passiert.

Zum Doktor hott sä hie gemüsst.

Un weil sä vurhär tüchtig gschwitzt,

springt sä fix nei de Dusch noch nei,

un sääft sich nochmol richtich ei.

Weil äh kä Wasser sie verschwend, 

dräht sä dänn Hahn zu an de Wänd.

Un wie sä nu vur Schaum fast starrt,

do dräht auf - un woart - und woart.

Es tröpfelt kurz un dann is Ruh,

„Jetzt stieh ich do, wos mach ich nu?“

„Su kann ich doch zum Doktor nett, 

ich bich ja nochert wie a Klett.“

Nu trampelt sä ä bisslä rüm,

dann fellt ihr Blick zum Spülklo hin.

Ihr künnt ruhig schö mol gelach,

denn richtig habte jetzt gedacht.

Mit änn klänn Becher schöpft sä nu,

un wescht ihr ganzä Säffn ro.

„Mein Gott, dös därf ich goar kenn soch,

sünst kumm ich noch nein Kirmesspruuch.

Vur Schreck müsst ich ja noch uffs Klo,

nu is dort ober ä kä Wasser do.

Am besten ich los ölles stieh

un gieh jetzt ärschtmol zum Doktor hie.“

Un ich muss ärschtmol wieder trink,

bevur ich vom Stuhl roh sink.

Än Partyservice hamm me fei ä 

in unnern schönn Rauestä,

Die Schulküch macht ölles für jedermann,

demit me tüchtig gefeier kann.

Platten, Zelote – ölles schö verziert,

kricht me von dänn Weibernä dort serviert.

Un dess döss Ganze noch bequemer wird,

sucht me immer än, der döss ausfährt.

Ämol hot’s unnern Christian vom Zivildienst getroffn.

Der woar an dänn Dooch vielleicht noch aweng besoffen.

Die Platten stenn fertich zum Ausfoahrn bereit.

Enä nur noch die Schilder mit die Namä schreibt.

Un los getts durch öllä Löcher un Gräm -

hinten tuts die Wurscht durchännanner häm.

An än Haus, do ledt är besonders vill aus -

wahrscheinlich wölln die mährä Schmaus.

Un die hamm gleich an fäzzn Spaß,

su vill für’s Gäld, wu gibt’s denn döss.

Die Tour is beend, jetzt hot är sei Ruh,

un är wend sich gemütlich sein Sofa zu.

Derweil deckt me hinten im Grom schö die Tisch,

„Heit ham me mol Platten von de Rosi – ganz frisch!“

Su spracht grad die Hausfrau vur ihra Gest,

denn ä runde Geburtstoch is ä größers Fest.

Weil die Leut vur Hunger die Messer scho wetzen,

tut de Enkel sich dann in Bewegung setzen.

Üm in Christian ze frechen, öb är’s wohl hott vergässen,

de Oma ihr Jubiläumsessen.

Un dän fellts wie Schuppen von die Ächen,

„Ich gläb, dös licht nu in annerä Mächn!“

De Geburtstoch woar hin, wos soll ich euch soch,

ich gläb es gab Fettbrot noch an dänn Toch.

Prost Laura!

Apropos Brot – losst euch noch sooch,

wos in Manzer passiert is an än schön Toch.

Dös Klingelauto mit Kuchen un Brot

woar an de Lehnersgass draußen – quasi tot.

Es ging nümmer vurwärts noch zurück.

Un dehinter staun sich Autos – schon zwä Stück.

Die Frä vornn, die kennt sich halt ä net aus,

un guckt ganz entnervt zum Fänster raus.

Ä wenn är innerlich a wenglä lacht, 

hot de Hartmut gleich Pannenhilfsdienst gemacht.

Dös Säl kümmt vorn na un ab geht die Fuhr,

dös Klingelauto kümmt widder auf Tour.

Die Frä is erleichtert und strahlt nä a -

wie söll ich’s nä gut mach, gutter Ma?

Un dodebei öffnet sä hinten ihr Tür,

zerrt mit freundlichen Blick ä Dreipfundbrot vür.

„Nä gutä Frä, döss brauch ich net,

wässt dä denn, wär vur de statt?

De Manzerbeck von Rauestäh

half dir do widder uff die Bäh.“

Die guckt nä su entgeistert a,

als käm är aus de Geisterbah;

Setzt sich ins Auto und fährt fort,

de Hartmut stett allä noch dort.

Wos woar denn hinzä nu verkehrt,

hot darä die Konkurrenz jetzt gstört?

Mir is egal, vielleicht is nu,

mit dänn Geklingel äweng ruh.

Ä besonder Gruß gett noch Erfurt zu unnern schön Innenminister,

denn där woar in dänn Joahr de größt Strechlesmacher.

Herr Minister, merk de äß – mir sänn Rauestäner Muster

un lossen uns net gern verschuster.

Dös wär doch gelacht,

wenn änner von uns HBN ans Auto na macht.

Noch HBN lossen wir uns net so leicht mogel,

denn mir sänn noch net reif für die Insel – Herr Vogel.

- Hochleberei -