Kirmesspruch 1992

Ä Pfingsten ohnä Kerwa wär
fä Rauestäh halt ziemlich lär.

Drüm frähn me uns, dess ich heit do
a Roll in meine Händ do ho,

dess Ihr su zahlreich bei uns stätt
un uff dös Kerwässprüchlä wärt.

Neun Pärlä senn me – su viel wie nie zuvor,
defür wor des Sprüchlä heuer ä Tour.

Es hett net viel gfählt un es wär so weit kumma,
dess me dös Johr noch Sprüchlä hetten defunna.

Die Zeit iss u hektisch – ach gätt me doch hin,
dess kenner mehr Zeit fe än Blödsinn kann g’finn.

Un kenner hot Zeit mehr dodrüber ze lachen
oder gor noch im Dorf mit die Rund ze machen.

Kä Klatschbas guckt ball mehr zum Fänster raus - 
die Martels und Mäckies, sie stärben uns aus!

Doch wu a Will’n is, do find sich a Wäch
uns u kummä a kurz vur Pfingsten die die Strechlä an Toch.

Un weil mir ja tüchtig und pfiffig senn,
tut heit etlichs noch auf meiner Rolln f´drauf stenn.

Im Gießer dort schwabbelt’s, schenkt fix a mol ei, 
dann leg ich los mit meiner Litanei!

Me kann, wenn me bloßnä will,
heitzetoch ga sehr sehr viel.

Un hot me dodezu noch Gäld
gibt’s kennä Grenzen auf de Wält.

Fur Johrnä senn sä dodezu übern großen Teich,
hinsä kann me gleich zu die „Ossis“ ausgeweich.

Mir bieten äfach ölles a,
für jeden, dä noch wos will wä.

Vorausgesetzt me hot a Flint,
kann me gor Wold zur Jagd gefind.

Su fand sich do beim Max mol ei,
a munterä Jagdgesellschafterei.

Mit Hallali und Hallala
geht’s auf zur Jagd dän Bärchlä na.

Dänn Saunä graut’s, die Rehböck rennä,
die Hosen in die Büsch drin flennä.

Nä a junger Hersch, dumm wie dä woar,
stellt sich genau vurs Flintenrohr.

Ach Gott wor dös a fäzen Fräd,
dös gutä Stück lag britschäbräd.

Jetzt wird gefeiert, Leut gätt mit,
jetzt genn me nei de Trinishütt.

Un draußen vur de Hüttentür,
do legt me hin dös gute Tier.

Drin ledt me die ganz Wirtsstumm ei,
zu därer Plattschußfeierei.

Die Zech wird groß, die Wertschaft lär,
de Jäger denkt, jetzt genn me äh.

Dann draußen trifft ne fast de Schloch,
de Hersch is wäg, wos söll är soch.

Von hinten lacht schon enner vür,
„Woar’s denn äh tot, dös gutta Tier?“

Me simeliert un rätselt rümm,
wu kann denn nä där Hersch bloß hin?

De Zufall will’s, dass zwä Doch drauf,
ä Ma gebückt de Stroß läfft nauf.

Auf seinä Schultern licht ä „Reh“ - 
es helt nä kaum noch uff die Bäh.

Dös gutta Stück dös lag wohl bloß
do grad su uff de ??? Strooß.

Un weil nä ja wo künnt pssier,
do trecht Är’s hemm dös schön Tier.

Sein Reim kann jeder sich gemach -
wo me söll halt von därer Sch.

Es komische is debei nur, 
das döss a Gast von de Feier woar.

Ich hoff, dös Reh stösst nä lang noch auf - 
dös gönn mer nä – do trink ich drauf – Prost!

Am vurigen Sunnamd hot me geschwind
a Stroß im Dörflä ümbenennt.

Die Weststroß hesst jetzt „Westernstreet“
weil’s ganz schö lebhaft dort zu gett.

Nachts fohrn sä dort die Autos a,
dess gleich im Bett sitzt jeder ma.

Zur Kerwa gibt’s a Stroßenfest,
döss gab ä scho manchen schö in Rest.

Doch wos die vurig Woch is passiert
hot ölles bis jetzt ausgeschmiert.

A Ma hot dort kurz vor de Nacht
an Lada zu viel Schrott gemacht.

Heimlich woar’s werklich nett, die Sach
är lobt noch „Guckt nä, wos ich jetzt mach!“

De Eschrich’s Claus wollt noch beschwichtig,
jedoch de Ma lesst sich net züchtig.

Än Oickel schingt ä in de Händ
derweil ä schö die Stroß vürrennt.

Dann hot’s geschwart und ganz schö gscheppert,
die Nachberschaft guckt ganz bedeppert.

„Dös is doch meis, drüm häb ich drauf
un hör erscht wenn’s kaputt is auf.“

Dann fellt na zu ölln Überdruß
äh noch dä Pickel auf sein Fuß.

Kaum woar wieder Ruh dort eigekehrt,
ging’s in än annern Haus verehrt.

In därer Küch gett’s ganz verquär
die Fräh die rennt scho hin und her.

De Sunntichsbraten quakert still
es is nä de Klostäch, der net will.

Wos mach ich jetzt – ach gätt me wägg,
dä färtich Kloßtäch is ä Dräck.

Jetzt mach ich Spätzlä – los geschwind.
Zur Küch nei kümmt des Enkelkind.

Än Stuhl zärrt sich des Jünglä bei
un guckt zum Spätzläskochtopf nei.

Uff ämol verliert är die Balance 
und taumelt rückwärts wie in Trance.

Är helt sich fest - do guckt nä hie - 
am Topf mit de Rouladenbrüh.

Gott woar dös schö in derä Küch
öllä hamm lgeich die Rouladen gesücht.

Die Zwiebeln hingä an die Stüll - 
Brüh hat me äh nu nümmer vill,

denn die sacht schö de Läufer auf.
Ich bin schö sot – ich pfeif do drauf,

secht do de Hausherr und gett hin -   
äh Sunndich ohne Klöß is schlimm.

Ich hoff vergässen is die Geschicht 
und dess dä heit an Kloß host gricht.

Dess Brüh und äh dös Fläsch gereicht hamm -
dodrauf Claus, stoß ich mit dir an.

Schenk ein Gießerträcher, dess die Klöß rutschen.

Die Autowerkstätten ham hinsä Hochkonjunktur,
denn es fohrn net nur Neue durch Wiesen und Flur.

Ä Ma rief neulich die Werkstatt a:
„Hälfft me schnell, mei Karrn springt nimmer a!“

Drauf hot sich de Mäster nein Auto gsetzt 
uni s wie a Hersch noch Sumbarch gewetzt.

Do drüm wird net lang diskutiert
un die Kist gleich mol ausprobiert.

Dä Wartburg lesst sich ä nett lang bitt
dä Ma denkt gleich ä kriegt an Tritt.

An ganz schön Qualm hotts zwor verbrett
ober Hauptsach is, dass wieder gett.

Ich mücht nu bloßna noch gewiss
wie teuer ämol alossn is!

Tut fix de Gläslä nochmal här
sünst wird de Gießer gor net lär.

Ä annerä wollt von sein Freund is Auto borch - 
weil a noch etlichs müsst besorch.

„Do host dä die Schlüssel, säh dich für - 
die Scheß stett draußen vur de Tür.“

Där schließt nä auf un fährt fix deva
do zuckt zesamm ä annera Ma.

„Wer fährt mit mein Wartburg do äfach fort? – 
Ich sitz uffn Dooch un de Schlüssel licht dort.“

Ä hott dann soft dänn Fall kapiert,
sei Auto, dös wird wohl grad entführt.

Un lecht gleich los mit viel Geschrei:
„Hälft me nä!“ – un – „Polizei!“

Där Fall hott sich Gott sei Dankfix geklärt
denn in Grümpen is de Fohrer ümgekehrt.

Neis Auto hett är nämlich goar nex mehr nei gekricht
weil’s fuller Dachpapp, Schiefer und Nechel liegt.

Su wos kann halt mol fürgekumm
desdewäche tun sä nett gleich dumm.

Jetzt wess me wenigstens wu me zur Not
im Fall der Fälle an Zweitschlüssel hot.

 Bevur jetzt wert stäbich mei Gusch
Gierträcher – wässt schö wos da mach musst.

Äs hot die Freiheit uns gebracht,
worüber wess Gott känner lacht.

Dös ist die Arbettslosigkät
die brängt in Blüm nu goar kä Fräd.

Deswäche hot är sich besunnä 
un schnell die ABM defunnä.

In jeden Ort kann me sä gesäh
die mähn un kehrn un streichen a.

Wos halt jahrelang net gemacht is wurrn
gibt me de ABM zu tun.

Die wiemeln rüm un schmeißen wäg
halt leider äh net nur in Dräck.

De Friedhof hat’s ja bitter nötig,
dess dort sich jemand mol betätigt.

Dös Friedhofshäuslä wird verklett
un ä die Wäch schö eigebett,

a Heck wird gepflanzt un Groos gemacht
un Abfallkübel angebracht.

Kurzum me künnt beinah gedenk,
wenn Gott mich jemals dohär lenkt,

dann ho ich’s friedlich un ä schö
do kann me obä falsch gemäh!

Söllt’s dann die ABM noch gäb,
künnt me vielleicht sei’s noch deläb!

Denn kaum hot me dann dort sei Ruh,
häm sä mit ihrä Pickel zu,

un reißen, kaum bist dä erscht nei
gleich dein neun Grobstäh wieder ei.

Die achten hinterher erscht drauf,
wär wor denn dös, wär stand do drauf?

Un wenn die Oma früh will gieß,
do wess sä nümmer wu sä is.

Dös Grob is wäg, is nümmer do
wus amol woar is jetzt a Plateau.

Sie hamm’s ober wieder in Ordnung gebracht 
drüm kann en dodrüber scho wieder gelach.

Ich hgläb ich muss jetzt noch ä Schlücklä trink
sunst kann ich heit nümmer mit’n Hut gewink.

Bevur ich dänn Spruch aus dä Händ jetzt gäb,
wöll me noch ä poar Leut hoch los läb.