Kirmesspruch 1991

Ich guck erscht mol a wenglärüm,
a ganz schö zahlreichs Publikum,
hot widder mol dän Wäch net gscheut
un ist zum Tanzplatz kumma heit.

Ich grüße euch ölla – nooch un nooch,
denn ich will heit mein Spruch aufsoch.

Ich bin heit do an däre Stell
vom Samels Ralf de neu Gesell.

Mit su än Mester hot mes schwär,
wär wird denn schö su gut wie är?

Dä woar a richtiger Kerwäsbursch,
hot Eifell gehot un ständig Durscht.

Ä hot sich heuer gesetzt zur Ruh
un hört nur bei mein mein Sprüchlä zu.

Su änner hott uns heuer gefählt
als mir die Kerwa hamm aufgestellt.

Mir hamm uns ja erscht vur 4 Wochen
is erschte mol zesamm getroffen.

Von do a senn me rümgerammelt,
ham Gäld un Er noch fix gesammelt.

Wor wär denn, wenn dös Dörflä net
ze Pfingsten äh sei Kerwä hett?

Su hat me halt noch unnerä Sorchen,
doch überstann is ja scho morchen.

Su aufregend wie is letztä Johr
worn öllä 40 net devur.

Erscht gab’s neus Gäld un ä neue Regierung,
die ogelöst hott und alte Führung.

Fä die meisten Betriebe kam de Bankrott,
aalabwärts ging’s erscht mol ganz flott.

Fä die än hört hört die Ärbet mitn Vorruhestand auf,
annerä schwimmä wetter wue Fett obendrauf.

Un weil’s bei uns noch su ruhig is, do künnt me gemäh,
is Lähm left sein Gang noch in Rauestä.

Doch äh bei uns do regt sich wos,
sälbst bei uns getts langsam los.

Mir hamm jetzt unnern „Kaiserdom“,
gebaut wird endlich de Marktplatz om.

Un es gibt hinsä – Gott sei Dank,
endlich äh a neue Bank.

Jeder zwetter is inzwischen Versicherungsmah
un jedä drittä ä Kosmetikfräh.

Die auswärtigen Geschäftsleut senn äh am kassiern,
denn die Leut käffn fleißig Fänster un Türn.

Die Heizungä wärn neu gemacht
un Teppich wärn neis Haus gebracht.

In größten Reibach auf öllä Fäll
machen die Autohändler an vorderster Stell.

Un weil die Autos in Deutschnä ihre Liebling sänn,
tut unner Spruch aus lauter lauter Autostrechlä bestenn.

Dös wor doe Vorred – jetzt gett’s gleich los,
doch langt fix erscht mol här dös Glos.

Nümmer in Suhl un Sumbärch käfft me ei,
jetzt getts noch Coburg und Neustadt nei.

Un dort, döss wess bald jedes Kind,
muss me ärschtmol an Parkplatz find.

Die worn do drüm schö immer knapp,
jetzt kumma die Ossis noch mit ihr‘n „Papp“.

Obä där hot en Vorteil, dös guttä Stück,
där passt sälbst nei de Winzigstn Lück.

Sälbst die zä finnä is heit noch schwär,
zwä Rauestäner wissen’s jetzt äh.

Dös Pärlä macht sich früh scho auf,
zum Wochenendgroßeinkauf.

Im Kofferraum ist Platz gemacht,
demit me äh viel häm kann gschaff.

Genügend Gäld is äh debei,
do fohrn sä schö zum Froschgrund nei.

Un in dän Coburg ham sä Glück,
im Zentrum finnä sä ä Lück.

„Do brauch me uns heit net ze blochen
un hamm des Zeuch net weit ze trochen.“

Secht grad de Mah zu seiner Fräh,
ich schließ noch zu, dann kumm ich ä.

Dos lesst die Fräh dort uff de Strooß 
an fäzengroßen Bläcker los.

„Ach Gott, jetzt trifft mich doch de Schloch,
du sollst me vurä doch noch soch,
des ich äh net dänn Topf vergäss, 
dä in de Küch steht uff’n Gas!“

Dort quakern friedlich vur sich hin,
die Windeln von dänn Enkelkind.

„Dös Zeuch kann doch a’gebränn,
wenn mir erscht nei de Stadt noch gänn!“

Dä Mah künnt sich grad Fett geläck,
am liebsten mücht är laut gebläck.

Kaum hot är heit ämol dös Glück,
do zieht’s ä schö sein Arsch zurück.

Alläh es hilft kä Lametiererei,
de Mah steigt nei sein Trabi nei.

Die Frä lesst är derweil zerück,
die muss sulang bewach die Lück.

Ich ho schö Franseln an de Zungä,
langt fix dös Gläslä hä ihr Jungä.

Im Winter, döss is halt nu mol su,
friern meistens ä die Stroßen zu.

Un waht me dann noch an än Bärg,
is die Sach halt dann doppelt arg.

Mir ham do än in Rauestä,
dä is noch rüstig auf die Bäh.

Obwohl är hett verdient sei Ruh,
wend är sich noch ein Kranknä zu.

Fährt schnittig wie bei Formel Eins,
sein Lada – unner Begers Heinz.

An su än gorschtigen Wintertoch,
hot ä su mit dän Schnie sei Ploch.

Die Lehnersgass wor a Eiskanal,
beim Uhl dort stäckt är [fest], wie fatal.

Ä Nachber von nä kam dezu.
„Herr Dokter“, socht där, „nä mit de Ruh,
mir zwä, dös wär ja doch zum Lachen,
wärn doch noch des Bärglä schaffen.“

Un eher de Dokter sich besinnt,
dä Mah ä scho sei Bäh hochschwingt.

Im Kofferraum, do nimmt är Platz,
jetzt is ä nämlich de Balast.

Derweil kümmt dort zu däre Stell 
ä annerä hilfsbereiter Gesell.

„Än Moment, ich hälf dezu,
ich mach bloß fix die Klapp noch zu!“

Un häbt mit seiner Händ fest drauf,
do heult’s do drin erbärmlich auf.

Grad wie de Hund von Baskerville
laut von do drinnä dös Gebrüll.

Dä Hälfer steht stocksteif ün bebt,
als sich der Deckel langsam hebt.

Ä denke, es schwinden nä die Sinn,
do saß de Hiedels Walter drin.

Bevur mir die Papierroll wird zä schwär,
do gäbt me mol dös Gläslä här.

Där dritt in unnern Strechlesbund,
hat erscht an Trabi – grün – gelb – bunt.

Dä wor nä nümmer schö genuch,
do hott är än Citroen sich gsucht.

Mit dän ging’s dann äh froh und munter,
im Dorf die Stroßn nauf und nunter.

Von ärä Fohrt kümmt de Mah hämm
un lesst sei Auto draußn stenn.

Im Haus drim muss är noch wos tu,
jetzt hot die Scheß erscht mol ihr Ruh.

Noch äre Weile di guckt är naus,
Kä Auto stand mehr vur dän Haus.

„Fräh, gieh nä mit, mit läfen los
un guckn erscht mol uff de Stroß.

Su schön sah’s doch nu äh net, 
das und dös ding noch änner maust.“

Sie ham’s dann ä gleich widder gefunden,
auf’s Doch gedrückt beim Nachber unten.

Där tritt schon dort un is verdutzt,
das me sei Haus als Parkplatz nutzt.

Die Handbrems woar net fest gemacht,
do dra hot kenner mehr gedacht.

Dän Wäch wor die Kutsch nogerollt,
vornüber dann auf’s Dach geknallt.

Dort liegt ä nu uni s zerdrückt,
hot Ziegel noch beiseit gedrückt.

Mit sein Trabant wär’s net passiert,
denn dä is ümmer gang wie gschmiert.

Gießerträcher, lang me noch ä Gläslä hi,
uf än Bä kann me doch net gstieh.

Ich hoff, es hamm heit ollä verstann,
wos ich do su ho von mir gäm.

In Munort unner Güschlä gett,
äh wenn uns mancher net verstett.

Dös is uns trotzdäm ganz egal -
es is halt unner Orginal.

Zegor is Fernsehn hot’s gebracht -
un wenn mersch su von fern betracht,

do hört sichs ganz exotisch ah,
dös Plaudern vor de Kamera.

Manch Fremer rätselt heit noch gewiss,
wos ächentlich ä Schlüpplä is.

Viel is heuer net passiert […]